دارميات ( بقلمي )

كرامة نفس عندي حزام وعزتي منجلي


بس لا سامح الله الوكت ناسي الليل ما منجلي


ولون بيوم التطر جم جلمة منج إلي ...


لأنزل نجمتين السما الج وتلوك ترجية







تحسب بقلبي إجلده بيها وتحد موسك


خنجر ذهب حدر الزمن آنه الأصل مو سك


مو من بلاش العمل هذا وعمه موسك


عميان قلبك ترة وماشفت ضيم البيا







شماتي مو شمات شماتي مردوني


وميت واهد النعش الموتوني شيعوني ؟





شماتك الشمات شماته سهله


ميت وشيعو بيك آنه شيعوني عدلة





جيت انعدل وياك ردت آنه أسمعك


موش الي يضرب بيك بس سبع اليوجعك





حجاياتي ليش ودوم تنحس ثكيلة


جيف الاحبه هواي يحجر دليله ؟





مو بس حجر يفلان دلال التحبه


بس الغريبة انساك وقلبك يعذبه





بسرعة ونساني وعاف ناسي المحنة


ليش اليحب ياناس ينخان ظنه





انته تظن منخان ظنك طلع بي


وآنه شكول عليه خاين واواسيه





جيت احمل الوسواس بصدري يسلعه


جن عربيد وبكاروك والنوب ارضعه !





يامرضع العربيد وذره ابفرد كاع


شك بالقلب خليت وما شلته وبساع ؟





شك بالقلب خليت من قهري منه


تغيرت طباع البيه حبنه وهملنه





هذا الهمل مرتاح وباله صافي


ميهمه دمع يسيل .. قلبه متعافي





عاف الله عالكلفات والسهله منها


لا تنشره ولا تنباع المحبة ابثمنها





بقلمي المتواضع